اتخنقت

تصميم الصورة : امل الشريف

                                    اتــخـنـقـــت
اتخنقت .. طبطبت على قلبى ..
لقيتنى ياعينى ببكى ..
سألت قلبى : طيب ليه البكا؟
قال لى : على حالك واللى جرى ..
رديت عليه : بتلومنى ؟
وإنت اللى غرقت فى الهوى ..
قال لى : هه .. هاتى الدفاتر تنقرى..

فاتخنقت ..
طبطبت على نفسى ..
لقيتنى من تانى ببكى ..
قالت لى نفسى : تستهلى ..
آدى آخرة الهوى ..
القلب بالعشق ينكوى ..

قلت لهم :
غصب عنى ..
ده كلامه سكر شهد ..
وحنانه بحر ماله شط ..
وطيفه يسبق نور الضى ..
وللّا قلبه .. ماشفت ليه زى ..

وسرحت ..
فاتخنقت ..
طبطبت على ايدى ..
لقيتنى من تانى ببكى ..
معقوله ..
ده بقى كان خلاص ..
وللّا كان كلام وخلاص ..
يعنى مافيش إخلاص ..
مكنش احساس ..
وللّا كان همس والسلام ..

لأ لأ ..
ده كان شوق وحنين ..
وحقيقة حلم ..
ما حلمته من سنين ..

ده عمرى اللى راح ..
وبكره واللى جى..
وحلمى شفته فى قلبه..
والله .. لمسته حى ..

آه .. آه .. آه تملا الوجود ..
آه ياحب عدى الحدود ..
آه ياقلب بالجراح موعود ..
آه ياليل خان الوعود ..
آه ياأنا ليه الوجود ..

واتخنقت
ولقيتنى ببكى ..
ولا لقيت ايد ..
تطبطب على جرحى..